الأحد، 15 فبراير 2015

لامنطق

و بقي لـ اللامنطق صوت
و مؤيدين في الأنتخابات


يتصوروا معاه و يغنوله
و يألفوا في حمده أبيات
و الموت بقتله تسعيرة
و دقون بتحرسله البوابات
يسمحوا أو لا يسمحوا
و يصدروا حكم عاللي مات
و الحزن أتمنع
لجل الصالح العام
 فرد الجبهة فرض
وواجب عليك الأبتسام
أياك و التكشيرة
و الزهق منسمعلهوش سيرة
ممنوع أنك تعتزل
ولا تنعزل
فُرِضَ عليك الأهتمام
ممنوع التراجع ولا الراحة
كمل لقدام
تنمية بشرية
إيجابية
مهلبية
مش من حقك الأنهزام
أفرح يا أبن الكئيبة
أشبع من الفتات
عايز تموت؟ ابتسم
عايز تحزن؟ ابتسم
أفرح حتي لو بتتهزم
شد زوايا بقك لحد الودان
لجل ما البسمة الحلوة المزيفة تبان
أنت ليه مش زيهم؟
ما أهم كلهم
عايشين الوهم بسعادة
صوت صمتك أعلي من صوت ضحكهم
بلاش تفوقهم بليز
صمتك ده حاجة تغيظ
أضحك بصوت عالي
بس بلاش ضحك ساخر
لحسن نجيبك من الأخر
و نوقفك وحدك قدام
لجل ما تضحك لنا في المايك بصوت عالي
عشان نحس بأنسجام...


ليست هناك تعليقات:

إرسال تعليق