من أجل صحة أفضل ... أخترنا لك ...
- لما يلوموك علي أن ثورة يناير تسببت في فتح السجون و
هروب مرسي و جماعته و المجرمين ، و ينسوا أن المجلس العسكري أفرج عن عبود الزمر و طارق
الزمر و 60 سجين بعضهم محكوم عليه بالأعدام ... يبقي دول مجانين متتناقش معاهم !
- لما يلوموك علي أن ثورتك هي اللي وصلت مرسي للحكم و
ينسوا أن المجلس العسكري هو اللي قبل أوراق ترشحه و هما عارفين – بحسب التسجيلات
الأخيرة والقضايا المرفوعة ضده – أنه متورط في قضايا تخابر و جاسوسية ضد البلد ...
يبقي دول مجانين متتناقش معاهم !
- لما مديرية أمن القاهرة يحصل قدامها تفجير بطريقة تنم عن
غباء من الداخلية و ينزلوا يحتفلوا بالأعلام عند مكان التفجير و يلوموك علي
الأنفلات الأمني و أن أنت بهتافاتك ضد بلطجة الداخلية و تعذيبها للناس في السجون بتهدم
الداخلية ... يبقي دول مجانين متتناقش معاهم !
- لما يتهموك بأنك بتكره الجيش و الشرطة وعندك عقدة ضدهم ،
و ينسوا أن علي الرغم من أن كنا مكويين من نار المجلس العسكري لكن رحنا عملنا مظاهرات
قدام السفارة الأسرائيلية لما حصل أختراق للحدود و ظباط و عساكر مصررين أتقتلوا في
عهد المجلس العسكري ، وكانوا هما في بيوتهم بيشربوا سحلب و أحنا بيتقبض علي ناس
مننا بسبب المظاهرات اللي بتطالب بحق الجيش و البلد و القصاص للظباط اللي ماتوا
علي الحدود ... يبقي دول مجانين متتناقش معاهم !
- لما وقت فض أعتصام رابعة طلع سلفيين و أخوان معروفين
بالأسم – في المناطق اللي نزلوا فيها – و حرقوا كنايس و ملاجئ و جريوا ورا راهبات
في الشارع و ضربوهم لكن مفيش حد فيهم في السجن دلوقتي مع أن ثورة يونيو أنتصرت –
زي ما بيقولوا – و الجيش بقي حامي حمي الشعب و دول سمكن بكمن و فرحانين بحبسة علاء
عبد الفتاح ... يبقي دول مجانين متتناقش معاهم !
- لما يشتموا 3 سنين في الثورة و التحرير و بعدين ينزلوا
يحتفلوا بالثورة في ميدان التحرير .... يبقي دول مجانين متتناقش معاهم !
- لما يقولك قانون التظاهر حلو حلاوة نقاوة بقلاوة مفيش
زيه و يفرحوا بأنه بيتطبق علي الثوار و يعملوا من شبين الكوم لما مظاهرات الأخوان
تبقي ماشية بالجرينوف في عين شمس و بالملوتوف في باقي المناطق و بالأعداد دي و
مفيش قطة طالعة تقولهم بس بأسم قانون التظاهر ... يبقي دول مجانين متتناقش معاهم !
- لما تبقي عربياتهم مسروقة و بناتهم بيتم التحرش بيها في
الشوارع و مش قادرين ينزلوا من بيوتهم من الخوف و يسيبوا الداخلية المقصرة و
يشتموا في ثورة يناير .... يبقي دول مجانين متتناقش معاهم !
- لما يشغلوا تسلم الأيادي في مكان أنفجار القنبلة و
فاكرين أنها تعويذة هتخوف الأرهابيين و تخليهم ييجوا يسلموا نفسهم – من الرعب مش
من الصداع بتاع الأغنية – و يعلنوا توبتهم و يرشدوا عن باقي القنابل و الأرهابيين
... يبقي دول مجانين متتناقش معاهم !
- لما يبقي الكل عارف أن الأخوان السبب و هما اللي بيفجروا
ويعملوا عمليات أرهابية و تروح الداخلية قابضة علي شوية نشطاء و أعضاء مجموعة لا
للمحاكمات العسكرية يروحوا يهللوا للداخلية و يحسوا أنها قايمة بواجبها .... يبقي
دول شوية مجانين متتناقش معاهم !
- لما يرفضوا التريقة علي مبارك و طنطاوي و سامي عنان و
السيسي و منصور – لأن دول في نظرهم رموز دولة – و يقبلوها علي مرسي علي الرغم من
أنه شئنا أم أبينا كان رئيس مصر و يعتبر رمز دولة .... يبقي دول شوية مجانين
متتناقش معاهم !
- لما يقولك 25 يناير مش ثورة و فاكرين أن بشوية التصوير
والأعلام و البمب و الصور علي الفبس بوك في 30 يونيو عملوا ثورة ... يبقي محروقين
قوي من 25 يناير و دول أصلا شوية مجانين متتناقش معاهم !
- لما يطلع معشوقهم شفيق مرتين يقول أنه كان مُبلّغ أن هو
اللي فاز بأنتخابات الرئاسة يوم إعلان النتيجة الصبح لكن تم إعلان أن مرسي هو اللي
فاز ولكن برضه يفضلوا يلوموا المقاطعين أنهم السبب في خسارة شفيق ... يبقي دول
شوية مجانين متتناقش معاهم !
- لما يقولك أنتوا مين و عددكم كام و شوية عيال ملكوش
لازمة و أتفرجوا علي أعدادنا و حجمنا و في نفس الوقت يلوموك علي أي مصيبة تحصل في
البلد ... يبقي دول يا حبيبي عالم هبلة و مجانين متتناقش معاهم !
- لما يقولك أنزل شارك برأيك في الدستور و قول نعم و
القنوات و الأعلام يقولها بكل وضوح و رخص تسويقي و يعملوا من بنها وهما بيشوفوا
أخبار القبض علي أي حد بيدعوا للتصويت بلا ... وقالك حرية !! ... يبقي دول ليسوا
إلا شوية مجانين متتناقش معاهم !
- لما يقولولك كمية السلاح اللي طلعت في رابعة و بعد فض
الأعتصام كانت هتطلع لو تم أعلان فوز شفيق و في نفس الوقت يلوموا المقاطعين علي
أنهم هما اللي ورطوا البلد في العنف اللي حصل بعض فض الأعتصام ... يبقي دول شوية
مجانين متتناقش معاهم !
- لما يضحكوا علي نفاق الأعلاميين في برنامج باسم يوسف و
بعدين يروحوا قالبين القناة يتفرجوا علي التوك شوز بتاعتهم و يصدقوا أخبارهم و يكملوا
مقتنعين بكلامهم و يخضعوا لتوجيهاتهم .... يبقي دول شوية مجانين متتناقش معاهم !
- لما يبقوا عارفين أن حزب النور السلفي أشد كرها للمجتمع
المدني من الأخوان و أن خطرهم علي المجتمع قائم و أن برهامي و محمد حسان وحسين يعقوب كله لسة صاحي و بيلعب ، لكن حاطين
لسانهم جوة بقهم و ساكتين لأن الألة الأعلامية لسة موجهتهمش ناحية أنتقادهم .... يبقي
دول مجانين متتناقش معاهم !
- لما يقولك الثوار ممولين من أمريكا و الدول الغربية و
بيطالبوا بمحاكمتهم و القصاص منهم و في نفس الوقت ساكتين علي رحيل 15 متهم أمريكي –
من أكتر من سنة - متورط في قضايا تمويل بسماح من المجلس العسكري و في عهده ... يبقي
دول شوية مجانين متتناقش معاهم !
- لما يصوتوا علي دستور – المفروض – بيحفظ الحقوق الشخصية
و الخصوصية و الكرامة لكل أنسان لكن يفرحوا و سكتوا علي تسجيل مكالمات و تعذيب
أشخاص بدون وجه حق لمجرد أنهم أخوان أو ثوار .... يبقي دول مجانين متتناقش معاهم !
- لما يقروا الكلام ده و يفتكروا أنهم مش هما المقصودين
بيه ... يقوا شوية مجانين متتناقش معاهم !
ليست هناك تعليقات:
إرسال تعليق