الأربعاء، 28 أغسطس 2013

أرجع ... !



المريض العقلي أو الشخص اللي بيطلق عليها مجازيا أسم (مجنون) بيكون عنده خيالات في عقله بتمثله عالم خيالي بيعيش فيه ويتفاعل معاه ومع اللي فيه ، وبينفصل تماما عن الواقع اللي أنا وأنت بنعيشه ...

العالم اللي أنا وأنت بنعيشه بيبقي بالنسباله وهم وشئ غير منطقي ، يعني لو هو شايف عامود النور شفاطة عصير فا ده كل المنطق بالنسباله ، ولو قلتله أن ده عامود نور فا أنت بالنسباله (مجنون) وبيضحك عليك في سره ...


اللي بيأكد الفكرة وبيدعم منطق الشخص ده أنه – في خياله – بيبقي شايف ناس كتير بيتعاملوا مع عامود النور علي أنه شفاطة عصير برضه ، فا ليه يصدقك أنت ويكدبهم هما ؟ أنت اللي مجنون ومش شايف الحقيقة بالنسباله ... الناس اللي في خياله دول بيشوفهم بياكلوا معاه ويشربوا معاه و يخرجوا ويتفسحوا ويمكن يكون متجوز منهم ومخلف أطفال خيالين بيحتفل معاهم بأعياد ميلادهم وبيوديهم مدراسهم و يشتريلهم لبس العيد ... !


أول خطوات العلاج هي أصعبها علي الأضلاق ، لأنها بتتطلب أن المريض ده يعترف بأنه مريض وأن كل اللي بيشوفه وبيتعايش معاه من سنين وبيمثله الحقيقية والمنطق مجرد "خيالات وأوهام" ولازم عشان يتعالج يسيب نفسه لناس غيره يقولوله أيه الحقيقي وأيه الوهم ، أيه اللي يختار يصدقه وأيه اللي يختار يكذبه ، أيه اللي يشوفه ويقرر يتعامل معاه علي أنه مش موجود وأيه اللي يقرر يشوفه علي أنه الحق المطلق ... الخطوة دي في حد ذاتها تعتبر خطوة "مجنونة" وفي غاية الصعوبة نفسيا !

المرض العقلي بانواعه أصيب بيه ناس كتير مثقفين ومشاهير وعلماء و عظماء زي Van Gogh ، Einstein ، Margaret Thatcher ، Niels Bohr  صاحب نظرية بناء الذرة ، وأشهرهم كان البروفسير John Nash  اللي جسد شخصيته الممثل Russell Crow  في فيلم A Beautiful Mind   ... القصد ان المرض العقلي مش بعيد عن أي حد !

عمرك شفت حد بيبصلك قوي ومعرفتش هو بيبصلك قوي كدة ليه ، ومجتلكش الجرأة تسأله ليه بيبصلك كدة ؟

مش ممكن يكون اللي بصلك ده هو الطبيب المعالج ليك أو حد من قرايبك أو أصحابك أنت مش فاكره بيحاول بنظرته دي يقولك : "أرجع" !
 

ليست هناك تعليقات:

إرسال تعليق