الاثنين، 19 أغسطس 2013

نحو فاشية آمنة



البلطجي اللي كل يوم يضربك قلم لأنه أقوي منك مش هيتغير غير لو سامحته وأنت في موقف قوة ، مش هيحس بالفرق غير لو كانت ليك فرصة للأنتقام بس أنت منتقمتش ... مش هيتغير غير لو فعّلت الرحمة مع العدالة ...

القانون اللي هو عايش بيه أنه يضربك طول ماهو يقدر ، والعدل من وجهة نظره ان انت تضربه وتفتري عليه لو قدرت لأنك ياما دقت من ظلمه فا من حقك تظلمه ...

بالنسبة للوضع الحالي عندك طرف مجرم "الأخوان" و "شعب" و طرف مجرم تاني "الداخلية" ... والشعب اللي ضد الأخوان يعتبر حاليا في موقف قوة لأن في طرف "مجرم" تاني أسمه "الداخلية" واقفة معاه في نفس المعسكر ضد  "الأخوان"

لو أنت مقتنع أن الداخلية بتتعامل مع الأخوان بمنتهي الحرفية وبتراعي حقوق الأنسان وأن الداخلية بتاعة سنتين تلاتة فاتوا غير الداخلية بتاعة دلوقتي ، يبقي حقك علي أنا اللي مجنون ، من فضلك متتعبش نفسك بقراية باقي كلامي

أما لو مقتنع ان في "تجاوزات" في طريقة تعامل "الداخلية" مع "الأخوان" يبقي معتقدش أبدا أن في مانع يمنع أني أقول للداخلية أنها غلطانة ! والتجاوزات بتاعة الداخلية دي لازم تقف لأنهم بيتعاملوا مع بني أدمين

و علي أعتبار أن حضرتك مش أخوان ولا من اللي بيحترموهم وانك –المفروض أو شايف نفسك- مثقف ومتعلم ومش خروف و مستقل وبتفكر و عندك قدرة علي التفكير النقدي وبتراعي ربنا وبتراعي حقوق الأنسان ، فا المفروض يكون ليك طريقة مختلفة عن "الأخوان" في التعامل مع الخصوم ... يعني متعملش زيهم الوحشين المتوحشين اللي قالوا أن معارضي مرسي لازم يتضربوا بالنار ... يعني المفروض تعامل معارضينك بطريقة أكتر "رقياً" من كدة

ولأن هدفي أن أعيش في دولة بتراعي حقوق الأنسان يبقي لازم أخاف علي حق الأنسان اللي الداخلية اللي وظيفتها "تطبيق القانون" بتتعامل معاه دلوقتي ، وعشان يكون في "عدالة" اللي حضرتك بتنادي بيها يبقي لازم القانون يتطبق علي الكل بما فيهم "الداخلية" والأنسان اللي بينتمي للأخوان لازم يتعامل بأدمية ويتحاكم محاكمة عادلة قبل ما يتنفذ فيه أي حكم

كون الأنسان يموت لأنه مجرم ده مش عدل ، مش كل الجرائم – حتي القتل – عقوبتها الأعدام علي فكرة ... ومطالبتك بمعاملة المجرم "بأدمية" ده ميهدمش فكرة العدل ولا يقلل منها .

يمكن يا سيدي بعد عشر سنين يرجع الأخوان تاني للحكم – قبل ما تهز راسك وتقول مش هيحصل أفتكر أن كان بيتقال علي مبارك أنه مش هيمشي – ساعتها الداخلية هتنحاز لصفهم لأنهم هما اللي في الحكم وأبقي قابلني بقي ساعتها لو فتحت بقك بكلمة فيها حرف ال "ح" أو حرف ال "ق"

هناك تعليق واحد:

  1. صدقت يا لاري ... المشكله بقى اني عارف ان الداخلية مش بس بتعمل تجاوزات مع الاخوان ده كمان بتعمل كوارث وجرائم لكن فعلا من اللي شفته من الاخوان مش قادر اطاوع نفسي واقول للداخلية غلط وما تتعاملوش كده وطبقوا القانون
    يا راجل انا حتى مش عارف اتعاطف مع اللي بيموت من الاخوان وده كارثة انسانية فظيعة
    ربنا يتولانا برحمته

    ردحذف