هووب في ظرف سنتين
بقي مدير الحسابات ... الناس بقت تضرب كف علي كف !!
مشهد في حتة كدة من اللي بنشوفها كل يوم .... وأتنين
قاعدين ( منفسن و معاهم معاهم ) وهيخش
واحد تالت بعد شوية
-
منفسن : أنت عارف ده مين ؟
-
معاهم معاهم : مين ؟
-
منفسن : ده يا سيدي اللي
نازل من العربية البي إن وحاطط سماعة بلوتوس في ودانه كان فراش في الشركة
-
معاهم معاهم : لأ !!
-
منفسن : هو أنا هكذب عليك
؟؟ ... انا أقولك .... بس أستني عشان داخل علينا .... صباح الفل يا سيد الكل ...
الشركة نورت يا فندم ... أجيبلك الأسانسير ؟
-
لأ شكرا أنا طالع عالسلم ...
-
منفسن : رياضة برضه يا باشا
... نورت الشركة يا فندم ... صباحك زي الفل
-
معاهم معاهم : هاااا .. اهه مشي
... يطلع مين ده ؟
-
منفسن : ده يا سيدي كان حتت
موظف أمن ... كان بكاليريوس تجارة وجه يقدم في الشركة هنا من 12 سنة ومكنش في مكان
في الحسابات ... رشق في الشركة وقال شغلوني أي حاجة ... وجالي وقالي شوفلي صرفة
... وأنا ساعتها أتوسطتله وشغلته هنا وأبتدا موظف أمن ... هووب في ظرف سنة رقوه
وخلوه مشرف ... وبعدين هووب اتدرب في الحسابات لمدة ست شهور ....هووب في ظرف سنتين
بقي مدير الحسابات ... الناس بقت تضرب كف علي كف ... بقي اللي كان بيصبح عليهم
الصبح ويركنلهم عربياتهم بقي مدير عليهم بعد 3 سنين وهما بقالهم قد كدة في الشركة
!!! ... هوووب نطة في التانية في التالتة بقي عضو في مجلس الأدارة وهووووب بقي
رئيس مجلس الأدارة من 4 سنين ... وماشية معاه حلاوة
-
معاهم معاهم : حظوظ ....
-
منفسن : لأ وأيه .... أنا
جالي خبر من واحد حبيبي في الشركة أنه هيترقي ويمسك فرع الشركة في دبي .... ياللا
... حظوظ علي رأيك
خلص المشهد
مشهد تاني في حتة شبه الحتة الأولانية ... أتنين ( منفسن
ومعاهم معاهم ) برضه قاعدين وهيخش واحد تاني بعد شوية
-
منفسن : تشرب حاجة ؟
-
معاهم معاهم : شارب المر والصبر
....
-
منفسن : أوبااااا .... عارف
مين ده ؟
-
معاهم معاهم : مين ؟
-
منفسن : ده اللي أتولد وفي
بقه معلقة دهب
-
معاهم معاهم : مين يعني ؟
-
منفسن : بس أستني عشان داخل
علينا .... صباح الفل يا باشا .... نورت الشركة ... أجيبلك الأسانسير ؟
-
يا ريت يا منفسن
عشان أنا معايا بس ورق كتير
-
منفسن : طب ويا باشا متجيبش
ليه سكرتيرة ولا سكرتير يساعدوك ... انت بتتعب برضه كتير وهما يشيلوا عنك شوية ...
أوباااا أهه الأسانسير وصل ... اتفضل يا باشا وأبقي أرتاح عشان صحتك مش معقولة شغل
علي طول ... في حفظ الله يا باشا ... الشركة نورت
-
معاهم معاهم : هااا ... مين
بسلامته اللي هتبوس علي أيده وتاخده في حضنك بالحنية دي ؟
-
منفسن : بس يا جدع بس ...
الواحد مبيطقش يشوف الناس دي ... أصل أمثال ده لا تعبوا في حاجة ولا شافوا مر
وسفوا التراب زيينا ... ده بسلامته أبن أخت البيه صاحب الشركة .... عيال ورور لا
تعبت ولا داقت شعبطة .... أتولد علي مكتب عدل ... ومن تكيف المكتب لتكيف العربية
وأوبباااااا هتلاقيه فجأة مدير وصاحب الشركة دي كلها
-
معاهم معاهم : حظوظ ....
-
منفسن : أيوة ياخي حظوظ
خلص المشهد بس المكان ده هتلاقي في أتنين قاعدين كل يوم
وهاتك يا كلام علي لبس الأنسة فلانة وعياقة مدام علانة ودلع الأنسة ترتانة ...
هي الناس عايزة أيه ؟؟؟
الناس لا عاجبها اللي شق طريقه بنفسه وطلع السلم من اوله
وأجتهد لحد ما بقي حاجة كبيرة ، ولا عاجبهم اللي أشتغل في مكان كبير لأن ظروفه
أهلته لده !!
لا عاجبهم البنت اللي مش باين منها ولا خلية جلدية واحدة
ويقولك تحت السواهي دواهي ، ولا عاجبهم اللي لابسة بكيني - وبعد ما يتفرجوا عليها
- بيتهموها بقلة الأدب !!
من الأمثلة التانية بستغرب مثلا طريقة تناول الناس
لشخصيات زي المدمنين اللي تعافوا من الأدمان ... يقولك : فلان ده كان مدمن ....
شفت المذيع ده ؟ كان مدمن وتعافي .... شفت الممثل ده ؟ أصله كان بيشم بودرة وبطل
... طب أنت عايز ايه ؟ أنت بتزله ؟ هل ده وصمة عار أنه كان حاجة وحشة وبطل ؟ ليه
دايما بتفكره بماضيه الوحش ؟ ليه الناس بتتكلم عالسلبيات بس ؟
أراء الناس في الغالب سلبية ومحبطة .... كلنا سمعنا جمل
زي : انت فاكر نفسك مين ؟ أنت يعني اللي هتغير العالم ؟ كان غيرك أشطر .... خليكي
في كوزك لما نعوزك ... أنتي ؟ أنتي تنفعي تبقي حاجة عدلة أنتي ؟ ... أدي دقني لو
فلحت .... إلخ
عشان كدة يا ريت اللي يلاقي حد مشجع وإيجابي يا ريت
يبروزهولنا ويحطه في فاترينة ونعدي عليه كل يوم الصبح نشحن شحنة تفاؤل وناخد صورة
4 × 6 ونمشي تاني
الناس مسيرها تتكلم سواء كنت ناجح أو فاشل .... محجبة او
مش محجبة ... ولد أو بنت .... متزوج أو مش متزوج ... لابس منغير هدوم أو لابس كل
الهدوم .... بتصلي أو مبتصليش ....
محدش هيشجعك عشان تعمل اللي أنت عايزه ... معظم الناس
هتحبطك لأن مش عايزين حد يبقي مميز عنهم وأشطر منهم ... أو لو بدافع كويس هيبقي
عشان خايفين عليك من الفشل
لكن في النهاية محدش هيفرح بنجاحك او حريتك قدك ... محدش
هيستمتع باللي بتعمله قدك .... مش محتاج أتكلم علي قصص محفوظة لعظماء سمعوا كلمة
فاشل اكتر من أسمهم لكن محتاج أكلمك عن نفسك ... انت عارف أنت عايز أيه ... بس
مشكلتك أنك بتدي الناس وكلامهم حجم ميستاهلوهوش .... لأن الناس هتفضل تتكلم تتكلم
تتكلم تتكلم تتكلم .... لحد ما يزهقوا ويلاقوا حاجة جديدة يتكلموا عليها غيرك ...
سيبهم يتكلموا
الناس عايزة تتكلم لأن مش فاضيين أو مكسلين يشتغلوا ....
الناس مش هتبطل كلام .... بس أنت لازم تبطل تسمعهم
المقال منشور بموقع "نون"
http://www.nooun.net/article/30/
ليست هناك تعليقات:
إرسال تعليق