الأحد، 16 يناير 2011

ليه يا ريس ؟


طب هقولك حاجة ولو سمحت إسمعني .... دلعني


ليه يا ريس العيش مش كافي ؟
ليه يا ريس الشعب ماشي حافي ؟
ليه يا ريس الدواء المصري مضر ومش شافي ؟

ليه في ناس كتير جعانة ؟
ليه بتعلم ومش لاقي شغلانة ؟
ليه يا ريس مصر دايما متهانة ؟

ليه يا ريس معظمنا كارهينك ؟
ليه قاعد وإنت عارف إننا مش عايزينك ؟
ليه ؟ ... ما تعمل حاجة تخلينا بالخير دايما فاكرينك ؟

ليه يا ريس خيرنا لغيرنا ؟
ليه تعبنا وزهقنا وكفرنا وجبنا اخرنا ؟
ليه مفيش تغيير مهما صبرنا ؟

ليه تسقينا حبك بالعافية ؟
ليه مصر كبيرة قوي قوي قوي بس الشقق مش كافية ؟
ليه الولاد الصغيرين تقولهم مصر يقولوا بللا قافية ؟

ليه يا ريس المصريين بقم بيكرهوا مصر ؟
ليه في ناس كتير عايشين في عشش وناس بتهادي رقاصة بقصر ؟
لو كان الفقر والجهل أعداءنا ... وعندنا مدارس وفلوس ... يبقي ليه إتأخر النصر ؟

ليه يا ريس ناس قليلة بس اللي معاها فلوس ؟
ليه خير مصر مش محسوس ؟
ليه يا ريس كل شوية بنسمع عن مصري جاسوس ؟

ليه يا ريس أنا مش شايف أمل ؟
ليه حاسس إن كله كذب في كذب مهما وزيرك قال وعمل ؟
طب قولي يا ريس ... لو ظابط ضربني ... أشتكي لمين ؟ إيه العمل ؟

ليه يا ريس العساكر بيضربونا ؟ هي الداخلية نسيت مين لازم تحارب ؟
ليه يا ريس المصريين هربانين في مراكب ؟
بجد يا ريس أنا عليك عاتب

بص يا ريس ... أنا ببقي ماشي في الشارع و خايف
وبيقولوا البلد مليانة بس أنا مش شايف
و بيقولوا في فرص ومساواة وكله ممكن يوصل ... وأنا بحاول أوصل ومش بوصل ... ليه؟ مش عارف 

يا ريس ده كل بيت في مصر فيه واحد عاطل
والبسمة علي وشوش الناس والقلب يصرخ باطل
ليه يا ريس الظلم ملي البلد؟ ... بقي مرض قاتل

ليه يا ريس البلد مليانة فساد ؟
تعليم وصحة وأمن وزراعة وتجارة وصناعة وكل يوم في إذدياد
ليه يا ريس اللي مسكته العصاية ماشي يزل العباد ؟

ألا قولي يا ريس ... هي الميه هتقطع ؟
أنا سمعت الموضوع ده ... وإنت عارف طبعا إن ده لا يمكن ينفع
أنا عايز أشوفك وأكلمك يا ريس ... ينفع ؟

طب هقولك حاجة ولو سمحت إسمعني
أنا مش غيران من أي شعب تاني واللي بيعملوه مش هينفعني 
بس أنا عايزك تاخد بالك مني شوية ... ولو أنا إبنك زي ما بتقول ... دلعني

ليست هناك تعليقات:

إرسال تعليق